مسرحية دنيا دوارة

تأليف : مالك القلافـ

1. عبد الغني .. رجل في الخمسينات ثري ومتزمت
2. عيسى .. الولد الاكبر يحب التبختر ودارس في امريكا
3. لؤي .. الولد الاصغر طيب القلب ويحب جده
4. الجد .. رجل طاعن في السن يحب ابنائه
5. حمدي .. خادم مصري دائم التذمر
6. عبيدي .. ابن الجيران والده توفى في حادث ومعدم الحال , ميال للضحك والفكاهه
7. مندوب الجمعيه .
8. مرافق مندوب الجمعيه .




المشهد الاول

(يفتح الستار على منظر للصاله في بيت ويبدو عليه مظاهر البذخ والغنى , ويوجد في زاويه البيت مكان قذر ,, وهو عباره عن مكان يجلس فيه الجد ابو عبد الغني ,, يدخل ابو عبد الغني يسنده حمدي)

حمدي/ يالله يابو عبد الغني فات الكتير مابئاش الا الئليل
الجد/ هاه
حمدي/ انا مش عارف انت مستحمل نفسك ازاي ؟
الجد/ هاه
حمدي/ ائعد .. ائعد .. ادي مكانك اهوه ( ويجلسه في مكانه بالزاويه )
حمدي/ عايز حاجه تانيه ياسي ابو عبد الغني ..
الجد/ هاه
حمدي/ انايلله .. باؤلك عاوز اي حاجه أبل مامشي
الجد/ هاه
حمدي( يخاطب الجمهور)/ انا عارفله العجوز ده (ثم يوجه الكلام للجد ) .. بأولك انا حاجوزك
يابو عبد الغني .. ايه رأيك ..؟
الجد/ ايه .. قول شديه من البدايه .. متى ؟؟
حمدي/ ااااااه اشمعنى دي اللي سمعتها بئه ؟؟ طب ومش مكسوف من نفسك ياراجل .. ده
عمرك عدى الميه الف وعاوز تتجوز ؟
الجد/ اي والله ياحمدي .. انا خلاص .. ايامي صارت معدوده .. كلها ايام والباري ياخد امانته


حمدي/ تمان سنين وانا شغال عندكم هنا .. زكل يوم بتئول الكلام ده .. اللي اصغر منك
بعشرين سنه انتقلوا الى رحمه الله ,, وانت قاعد لنا زي القضا المستعجل ,, امتى
حتستقيل بئه وتريحنا ..
الجد/ فال الله ولا فالك .. روح بس جيب لي كاس ماي .. يالله روح
حمدي/ ميه ايه انت الاخر .. ده انته لسه شارب ميه اولة مبارح ,, ايه مابتشبعش ؟؟
الجد/ هاه
حمدي/ يووووه .. انا اروح اشوف شغلي احسن

(يخرج حمدي .. فينادي الجد على حفيده لؤي )

الجد/ ياعبدالله .. ياعبدالله .. ( يدخل لؤي في هذه الاثناء )
لؤي/ جدي .. بعدك على عبدالله .. اسمي لؤي متى بتعرف تقول اسمي ياجدي
الجد/ كلنا عبيد الله وانا يدك .. وبعدين اسمك مايجي فلساني
لؤي/ ماعلينا .. وش بغيت جدي .. امرني ..
الجد/ هاه
لؤي/ اقولك وش بغيت ياجدي .. امرني
الجد/ مايامر عليك عدو ياوليدي .. بس ابي اشرب ماي عطشان .
لؤي/ بس ماي ياجدي .. عيوني لك

( وبسرعه يتناول لؤي الماء ويشرب جده , واثناء ذلك يدخل الاب ابو عيسى) (1)

الاب(بعصبيه)/ لؤي وش تسوي ؟؟؟
لؤي(بارتباك)/ قاعد اساعد جدي يشرب ماي يبه ..
الاب/ وكم مره قلت لك لاتقرب منه ..
الجد/ ياولدي ياعبد الغني .. انا قايل له يشربني .. من الصبح عطشان .. وانت مثل مانت
عارف ماقدر حتى احرك ايديني
الاب(بغضب)/ اسمع يايبه .. اولادي مالك شغل فيهم .. تبي شي عندك حمدي يجيبلك اللي تبيه
لؤي/ يبه .. جدي دايما يشتكي من حمدي ويقول هالمصري مايعامله زين .. ودايما يتذمر منه
قدامه .. وبعدين يبه وش فيها لو ساعدت جدي ..
الاب/ ياولدي يالؤي .. انا خايف عليك .. يعديك بالبلاوي اللي فيه
لؤي/ بس يايبه انا ماخبري جدي مريض ؟؟!
الاب(باستطراد)/ انا ماقلت لك انه مريض .. بس يدك اكبر وخرف .. وانا مادري كيف ماتلوع
شبدك منه .. طالع كيف اوصاخه حواليه .. ( ويأشر على ابوه باشمئزاز )
لؤي/ بس يايبه اسمحلي اقولك ........ (يقاطعه الاب)
الاب(بعصبيه)/ وبعدين معاك يالؤي .. خلاص اسمع كلامي وقول انشالله
لؤي(بامتعاض)/ انشالله يبه .. انشالله
الاب/ المهم ياولدي .. انا باروح المطار .. اباجيب اخوك .. اليوم بيوصل
لؤي/ اخوي .. اي اخو ..؟؟!
الاب/ شيه كم اخو عندك ..
لؤي/ اهااااااا .. اخوي عيسى .. والله نسيت ان عندي اخو .. من راح امريكا على قولته بيدرس
مازارنا الا مره وحده من قبل 8 سنين .. يوم تتوفى الوالده الله يرحمها
الاب/ الله يرحمها ..
لؤي/ انزين يبه وش رايك اروح وياك المطار
الاب/ انت تامر امر .. كم لؤي عندي انا .. يالله اتجهز علشان بعد شوي بتوصل طائرته


(يرن جرس التلفون عند خروج لؤي ويرفعه الاب)

الاب/ الو .. نعم .. خير وش بغيت .. اها .. خلاص خل الاوراق في المكتب واذا جيت اشوفهم
.. نعم نعم نعم ..هذا اللي ناقص بعد اشكالك تجي تعلمني شغلي .. قلت لك خل الاوراق في
المكتب وانا لمن اجي الشركه اشوفهم .. يالله

(يغلق التلفون ويهم بالخروج فيناديه الجد)

الجد/ ياولدي ياعبد الغني ..
الاب/ خير
الجد/ ياولدي .. ادري انك متأذي من جلستي اهنيه . وادري انك تتضايق لمن تشوف لؤي
يقرب صوبي ..
الاب(باستعجال)/ وش اللي تبي توصل له يايبه
الجد/ انا اقول وانا ابوك بدل مانت شايل همي .. ابو سلمان الله يذكره بالخير اخر مره زارني
فيها .. قال لي عن جمعيه عندنا اهنيه فسيهات .. فيها مكان للمسنين .. يوجبونهم
ويرعونهم .. فانا اقول وانا ابوك .. ودني اهناك ولاتشيل همي .. وترى ماياخذون من
عندك فلوس .. (2)
الاب(باستنكار)/ الجمعيه .. لالالا .. كل شي الا الجمعيه .. وبعدين السالفه مو سالفه فلوس ..
السالفه انك اذا رحت ودروا العالم ان ابو عبد الغني اهناك باصير علش فبوز اللي يسوى
واللي مايسوى .. انت تفكر اني مافكرت فيها .. بس تراجعت حفاظا على اسمي بين الناس
الجد/ خايف على اسمك ياعبد الغني .. انالله وانا اليه راجعون ..
الاب/ يايبه انت ناقصنك شي .. اكل وتاكل وشرب وتشرب .. وكل شي يجيبلك اياه حمدي لين
عندك .. يعني موناقصنك شي ..
الجد/ لاناقصني .. ناقصني وانا ابوك ناقصني .. ناقصتني الرعايه .. ناقصتني المحبه ..
ناقصتني يمعتكم حوالي وانا فاخر عمري .. مادري فاهمني ياعبد الغني ولالا ..
الاب(بتملل)/ يعني يايبه تبيني اهد شغلي واجابلك

(يدخل لؤي في هذه الاثناء)

لؤي/ يبه يالله انا جاهز .. ( يأخذ ابوه على جنب) .. يبه وش رايك ناخذ جدي ويانا ؟؟
الاب/ لؤي .. هذا وانا اللي دايما اقول عنك انك عاقل
لؤي/ افا يبه ..
الاب/ ايه يالؤي .. شلون بناخذ يدك واهو مايقدر يتحرك ..
لؤي/ انا اقولك .. ( وينادي على حمدي ) .. ياحمدي .. حمدي ..
( فيظهر صوت حمدي من الداخل )
حمدي/ ايوه ياباشه ..
لؤي/ جيب كرسي جدي المتحرك .. (يحضر حمدي الكرسي ويأخذه لؤي)
لؤي/ ( ينظر الى ابيه وبيده الكرسي) هاه وش رايك يايبه ؟؟
الاب /( بعد ان يجلس على الكرسي ) والله فكره .. وش دراك ان انا تعبان ..
يالله دف دف وان ابوك .
لؤي/ لا يايبه .. الكرسي هذا نقعد عليه جدي ونوديه المطار ويانا .. زش رايك .
الاب/(بتذمر) يالؤي وبعدين معاك .. يعني لازم تسويلنا شغله .. احنا متأخرين .. تلاقي اخوك
الحين يستنى فالمطار .. مانبغى نتأخر عليه ازيد .. مايمدي يالؤي مايمدي .
لؤي(بتضايق)/ اللي تشوفه يايبه .. اللي تشوفه
الاب/ يالله يالؤي .. ود الكرسي داخل وبسرعه علشان نلحق لانتأخر

( يدخل لؤي بالكرسي ويهم ابو عيسى بالخروج فيناديه حمدي )
حمدي/ ابو عيسى .. ابو عيسى .
الاب/ نعم .. وش بغيت انت بعد .. لايكون تبغي تروح انت بعد ويانا المطار ..
حمدي/ لالا اروح معاكم دأيه
الاب/ اجل وش بغيت .. واخلص ماعندي وقت
حمدي/ الا انت امتى حتديني بقيه مهيتي ..
الاب/ ذكرني بعدين اعطيكياها .. الحين مشغول .. ماتشوفني بالروح المطار
حمدي/ من اول ماحطيت رجلي عندكم فالبيت وانت كل يوم مشغول .. عندك فكره يابو عيسى
ان اهلي مش لاقيين ياكلوا ( ويتباكى بحركه كوميديه )
الاب/ حمديوه .. كم مره قايلك هالحركات دي لاتسويها وياي .. انت ماتفهم .. خلاص قلت لك
مشغول يعني مشغول
حمدي/ تمام يافندم .. انا برضه باقول كده سعادتك .. اصل انت دايما مشغول . ( يدخل لؤي)
الاب/ يالله يالؤي لانتأخر ( ويخرج الاب فيتجه لؤي الى جده )
لؤي/ جدي .. احنا بنروح المطار .. علشان اليوم بيوصل عيسى .. (3)
الجد(بفرح)/ والله .. وش رايك تاخذوني معاكم .. منها اشم شويه هوا ومنها استنى عيسى
معاكم .. اكيد بيستانس اذا شافني
لؤي/(بارتباك) هاه .. لكن .. تصدق ياجدي.. ابوي كان ناوي ياخذك ويانا .. بس تعرف
الطياره وصلت .. واخنا متأخرين على عيسى مسكين .. ولو بناخذك بنتأخر عليه ..
الجد/(بحزن) صحيح .. صحيح ياعبدالله .. خلاص اجل روحو بسرعه لاتبطون عليه .. ترى
عيسى ولدي اعرفه ماينوس لحاله (يتجه لؤي لحمدي )
لؤي/ هالله هالله فجدي .. هاه حمدي .. مااوصيك
حمدي/ اطمن وحط فبطنك جحه صيفي .. ( يخرج لؤي )

حمدي/(محاولا تقليد لؤي) هالله هالله في جدي هاه حمدي .. مااوصيك .. جاتك نيله انت
وجدك ( يأشر على الجد ) ده وش ينخاف عليه ده ..
الجد/ هاه
حمدي/ يوووووووووووه ( ويخرج حمدي )



ينتهي المشهد الاول

المشهد الثاني

(يفتح الستار على دخول الاب وابنائه راجعين من المطار والجد في مكانه نائم )

الاب/ حي الله ولدي عيسى .. ابد ماتفكر تزورنا .. من توفت امك اذا مانتصل لك احنا ولا انت
ابد ماتفكر تتصل
عيسى(بارتباك)/ شسوي بعد يايبه .. تدري بعد .. الدراسه صعبه هناك يبيلها تركيز ..
لؤي/(بسخريه) ايه الله يغربلها الدراسه .. ان كان بعد مثل الصور اللي ترسلياها في الايميل ..
خوش دراسه ماخذه وقت اخوي عيسى .. له حق مايتصل ..
عيسى/ والليل .. اتكلم عاد فضيحه زمانه
الاب(وهو يضحك)/ المهم ياولادي .. انا باروح الشركه .. تبون شي
الاولاد/ سلامتك يبه ..... (ويخرج الاب)
عيسى/(وهو يدور في ارجاء البيت ) الله كل شي وحشني فهالبيت .. التلفزيون .. الكنب ..
الزوليه ... ( يمر على جده بدون ان ينتبه له )
الجد/ عيسى .. (ينصرع عيسى)
عيسى/ بسم الله الرحمن الرحيم .. What is this?
الجد/ الله .. قام يتكلم عنقريزي .. تعال ياولدي تعال .. تعال ترى يدك مشتاقلك
عيسى/ شيه بعده مانقرض ديه ؟؟
لؤي/ لاتقول شديه على يدك حرام عليك
الجد/ تعال ياعيسى خلني اضمك
عيسى/ تضمني وانت بهالصوره .. لا يبه .. قبل لاتطير الطياره من مطار نيويورك شوف منو
اللي كان ضامني .. وشوف لمن وصلت اهنيه منهو اللي يبي يضمني .. والله مشكله ..
يالله باي .. باي باروح اشوف الشارع واشوف البلد تغيرت ولالا ( ويخرج عيسى)
الجد/ عبدالله ..
لؤي/ رجع على عبدالله .. امر جدي بغيت شي
الجد/ ليش عيسى ماجا سلم علي وانا يدك
لؤي/ الغربه غيرته ياجدي
الجد/ وتخليه يتغير على جده .. جده اللي ربى ابوه قبل مايربيه .. انا وانا ابوك اللي شاله اول
ماطلع على ويه الدنيا .. انا اللي اذنت اذان ربك في اذنه .. يجازيني كذا .. حسبي الله
ونعم الوكيل
(ويضع رأسه لينام)

لؤي/ الا اقول جدي .. جدي .. نام والله ماسرع ماينام جدي ..
( يتسلل عبيدي فيراه لؤي ويضحك)
لؤي/ تعال ياعبيدي .. تعال .. مو اهنيه ابوي .. لاتخاف
عبيدي/ انا شفت سياره ابوك مو اهنيه اتشجعت ودخلت .. ابغيك ضروري
لؤي/ خير اعبيدي وش بغيت
عبيدي/ لابس السالفه ومافيها ..... ماعندك عشر ريال سلف ..
لؤي/ سلف ؟؟ وانت كل مره تاخذ من عندي وتقول سلفمع انك تدري وانا ادري انهم
ماراح يرجعون ..
عبيدي/ هي هي هي .. سجلهم عندك بالدفتر .. واصبر لين مايوزعزن ورثه ابوي وباعطيك
افلوسك .. موقاعد اتمنني الحين انت ..
لؤي(يضحك)/ صار لك عشر سنين وانت تردد هالكلام
عبيدي/ والحين بتعطيني ولالا .. السيكل مفقوع صاير له يومين .. وابغى اروح النادي عندنا
تمرين اليوم مهم
لؤي/ اخذ ولاتأذيني .. ( في هذه الاثناء يدخل عيسى )
عيسى/ oh my god .. لؤي منو هذا .. الله ولد جيرانا عبيدي .. والله كبرت
عبيدي/ ايه وانت اصغرت .. منهو انت
لؤي/ هذا اخوي عيسى ياعبيدي ماعرفته ؟
عبيدي/ والله .. يااااااااااو من زمان ماشفته .. وينك انت من زمان ماشفناك
عيسى / توني واصل اليوم .. فقلت اخذ لي لفه في البلد .. اشوف وش تغير فيها ..
عبيدي/ وعسى الفرق مو وايد بينها وبين نيويورك سيتي
عيسى/ والله شاقولك .. درت كل الحواري اللي في سيهات ماشالله التغير شاسع .. ماشالله
الفرق واضح ( بتهكم )
عبيدي/ مريت الديره ؟؟
عيسى/ ايه .. ايه ماشالله السوق عامر.. والشوارع واسعه ولافيه زحمه ابدا عند سوق الذهب ..
لا والشوارع كلها مسفلته
عبيدي/ مريت حي الكويت ؟؟
عيسى/ ايه طبعا .. طبعا .. يكفي المدخل بس عند نادي الخليج .. من نعبر تجيك الروايح
العطره مع الانهار المنسابه على جانب الطريق .. لا ومسوين حمله تنقيب عن
الاثاراهناك .. ماشالله شوف التطور لوين وصل ماشالله .. من اول مارحت امريكا لين
الحين ازيد كم ثمان اسنين واهم في الحفريات ينقبون عن الاثار ..
لؤي/ مريت المحدود
عيسى/ شالوا البواليع وماتشوف ولا بالوعه فايضه ..
عبيدي/ واكيدمريت السلام
عيسى/ ايه .. ايه على طاري السلام .. مريت كان فيه سوق .. يقولون اسمه سوق الاربعا ..
يشبه سوق فامريكا اسمه امركان مول بالضبط يشبه.. اللهم الفرق ان اهناك فالسوق
يغازلون بس اهنيه من تعبر الوحده الكل ينزل راسه ولااحد يرقم ولاشي ابدا ..
(اثناء الحديث يدخل الاب فجأه )
الاب/ عبيدوه .. ماقلت لك لاتدب البيت
عبيدي(بخوف) / والليل .. طرق المدينه شر عظيم .. يالله مع السلامه ( ويهرب )
عيسى (بعد ان يضحك )/ يالله من رخصتكم .. باروح ارتاح في غرفتي .. تعبان مانمت
(ويخرج) ..
لؤي/ يبه انت ليش تعامل عبيدي كدا ؟
الاب/ ياولدي يالؤي .. انا ربيتكم على النظافه .. وهالوصخ بيخربك .. يالؤي لازم تعرف انك
ارفع من انك تصادق هالاشكال .. انت ولد عبد الغني .. واهوه حيالله شوف ولد من ..
لؤي/ موذنبه انه ....... (يقاطعه الاب)
الاب/(بعصبيه) لا ذنبه .. ذنبه امه طلع فقير .. وبعدين يالؤي .. شفت هذي نتايج قعدتك مع
عبيدي هالوصخ .. صرت ترادد ابوك .. اسمع كلامي يالؤي .. وقول انشالله
لؤي/(بامتعاض) انشالله يبه
الاب/ بارك الله فيك .. انا باروح غرفه المكتب .. باراجع اشويه اوراق ... ( ويخرج الاب)
الجد/ عبدالله .. ياعبدالله
لؤي/ نعم جدي .. تبغي ماي
الجد/ لا وانا يدك .. ابغيك انت .. ابغي اتكلم معاك ..
لؤي/ امرني جدي ..
الجد/(بحزن) ايامي صارت معدوده يابوك .. الله يكفيك ويكفي السامع شر ارذل الاعمار ..
بس كلها ايام وتفتكون مني .. حاس ياعبدالله المنيه قربت ..
الجد/ الموت حق وانا يدك .. وانا خلاص قرب الباري ياخذ امانته .. بس باقولك شي قبل
لاياخذني الموت .
لؤي/ بعيد الشر عنك .. قول ياجدي .. امرني .. تبغي مني شي ..
الجد/ اوصيك بابوك
لؤي/ ابوي .. وش فيه ابوي
الجد/ ابوك بكره بيكبر .. ايه بيكبر ياعبد الله وبيحتاج لمن يسنده .. ادعي له بطوله العمر
وتحمل اي شي يجي من صوبه .. تحمل بابوك ياعبدالله ولاتزعله .. لاتزعل ولدي ترى
بتزعلني فتربتي .. خذها مني نصيحه ياولدي .. ترى هم سنين يختفي ببسمه .. مابغى
بكره ابوك اللي اهو حشاشه يوفي يحس ويعاني من اللي عانيته .. وصيتي ابوك ياعبدالله
.. ولع له اصابعك العشر شموع .. يوم اللي يحس الدنيا تظلم بعينه .. افرش له جفونك
فراش يوم اللتشوفه طايح وتعبان .. خل ادموعك تسبق ادموعه .. يوم اللتشوف الهم جاثم
على صدره .. تذكر كلمتي وانا يدك .. تذكرها وقول الله يرحمك يايدي ..
لؤي/ انشالله ياجدي .. كل اللي تقوله بيصير . ولا يصير خاطرك الا طيب
الجد/ هذا العشم فيك ياولدي ..
لؤي/ يالله ياجدي .. انا باروح غرفتي باذاكر شوي .. تبغي شي قبل لااروح ..
الجد/ لا .. بس انتبه لدراستك وانا يدك ..
لؤي/ انشالله يدي ..... ( ويخرج لؤي )

(الجد يبكي ثم ينزل البلاي باك .. كلام الاب الموجه للؤي وهو يمنعه عن خدمه جده والعنايه به .. ثم ينتهي البلاي باك والجد على صوره نائــم ومغمض العينين .. في هـــــذه الاثناء يدخل لؤي )

لؤي/ جدي .. باسألك سؤال .. جدي .. جدي .. بسرعه ينام هالجد . مالحق ماتركته .. نام على
طول .. جدي .. جدي .. (يتجه لؤي الى جده ويهزه ليكتشف انه مات )
لؤي /( يبكي بشده ويصرخ ) جدي .. جدي ..... يباه .. عيسى .. تعالو .. جدي مات ..
جدي مات

وينتهي المشهد الثاني

المشهد الثالث

(يفتح الستار ولؤي جالس امام زاويه جده وهي خاليه ثم ينزل البلاي باك والجد ينصح لؤي .. ثم يبكي لؤي )

لؤي/ الله يرحمك ياجدي ... (يدخل الاب)
الاب/ لؤي انت اهنيه
لؤي/ وين تبيني اروح ..
الاب/ اطلع وانا ابوك ..قعدتك بالبيت مامنها فايده ..
لؤي/ مالي خلق يايبه ..
الاب/ لاحول ولاقوه الابالله .. انزين على راحتك بس قوم نادي حمدي .. باخليه ينظف الزاويه
هذي . ويشيل اغراض جدك يحطهم بالمستودع
لؤي( باستغراب)/ ليش ؟؟؟؟؟!!
الاب/ شاللي ليش .. يعني انت شايفنه عدل الحين المكان كدا ؟؟
لؤي( بعصبيه)/ لأ يايبه .. لألأ ..
الاب/ هاه ؟؟! شاللي لا .. وش فيك يالؤي ..
لؤي/ الزاويه هذي بتظل مثل ماهيه .. ارجوك يايبه ..
الاب/ بس يالؤي ..
لؤي/ من غير ليش يايبه .. هالزاويه تذكرني بالمرحوم .. ارجوك .. اذا تحب ولدك لؤي
بتخليها
الاب/ خلاص .. ولايهمك .. زاويه يدك وبنخليها .. وش تبي بعد بس انت اضحك وارجع لؤي
اللي اعرف ياولدي .. ومايصير خاطرك الا طيب ..
لؤي/ مشكور يبه .. الله لايحرمنا منك .. (يرن جرس الباب فينادي الاب على حمدي)
الاب/ حمدي .. شوف منو عند الباب .. (يدخل حمدي بمكنسته وملاس الطبيخ واهو يتذمر)
حمدي/ شوف منو عند الباب ياحمدي .. نظف المكان ياحمدي .. روح ياحمدي .. تعال
ياحمدي .. ربنا يخرب بيتك ياحمدي ..
الاب/(بصرخه) روح شوف منو عند الباب وعمى .. (يخرج حمدي مسرعا وهو خائف )
الاب/ لابارك الله فيك .... (يدخل حمدي)
حمدي/ ابوعيسى يابوعيسى..
الاب/ نعم وش بغيت ..
حمدي/ اتنين عايزينك بره
الاب/ خلهم يدخلون .. (اثناء خروج حمدي ليدخلهم يستأذن لؤي)
لؤي/ استأذن انا الحين يبه
الاب/ وين يبه
لؤي/ باروح ارتاح شوي
الاب/ الله وياك يبه .. (يخرج لؤي ويدخل مندوب الجمعيه ومرافقه )
مندوب الجمعيه/ السلام عليكم ..
الاب/ وعليكم السلام .. اتفضلوا استريحوا .. خير امروا ..
مندوب الجمعيه/ كل الخيرانشالله يابو عبد الغني .. احنا جايينك فموضوع مهم ..
الاب/ موضوع مهم .. اجل لحظه بس اخلي حمدي يسوي شاي ..
مندوب الجمعيه/ مايحتاج يابو عيسى مايحتاج ..مانبي نطول عليك ولانبي نكلف عليك ..
السالفه ومافيها .. مثل ماتعرف يابو عيسى ديرتنا محتاجه .. وفيها كثير من
الاهالي اللي مولاقين ياكلون اتصدق يابو عيسى .. شوفه عيني ماحد قال لي
...... ( يقاطعه الاب)
الاب/ اخلص علي وش تبي الحين .. وش المطلوب

المندوب/ مثل مانت عارف يابو عيسى .. جمعيه سيهات من اول الجمعيات بالمملكه وكرست
نفسها لخدمه الديره واهل الديره .. وكيد طبعا من فتره لفتره هالجمعيه تحتاج للدعم
من رجال الاعمال والتجار الكبار في الديره .. واحنا لازم نمد لها يد العون ..
الاب/ اه يعني انت ياي الحين علشان اتبرع ؟؟
المندوب/ ولو بمبلغ بسيط وانشالله بيحسب في ميزان اعمالك
الاب/ بلا جمعيه بلا غيره .. انا ابوي واهو ابوي على حياته ماوديته الجمعيه ..
اقوم الحين بعد مامات اساهم ..
المندوب/ وش فيها دام انك مقتدر
الاب/ اقول ترى حشيكم ماعجبني وهالقرشين اللي باعطيكمياها .. اعطيها اولادي يستانسون
ابها احسن ..
المندوب/ انت مانت مجبور انك تدفع ياعبد الغني .. بس انا جاي اكلمك لمصلحتك .. لانك
بتساعد اهالي ديرتك وبتزكي اموالك وبترفع من اجرك عند الله ..
الاب/ مااقنعتني..
المندوب/ يابو عيسى ترى ..... (يقاطعه الاب)
الاب/ انالله غصب اهيه قلت الكم مابتبرع .. اعوذ بالله
المندوب/ على راحتك يابو عيسى .. احنا سوينا اللي علينا .. على العموم اذا فكرت تساهم
فالجمعيه فاتحه ابوابها اربع وعشرين ساعه
الاب/ مع السلامه (يخرج مندوب الجمعيه ورفيقه ويدخل بعدهم على طول عبيدي واهو
لابس ثياب التمرين وعليه شعار الخليج)
عبيدي/ مساك الله بالخير عمي (ويحاول تقبيل راس ابو عيسى .. وابو عيسى مندهش )
الاب/ عبيدي .. والله ماعرفتك .. صاير نظيف ماشالله عليك .. ايه الحين عادي
لو قعدت مع لؤي
عبيدي/ عمي انا موجاي للؤي .. انا جاي لك انت ياعمي..
الاب/ جاي لي انا ..؟؟ وش بغيت ؟
عبيدي/ ياي ياعمي حق اقولك .. مثل مانت شايف انا الحين صرت لاعب كوره اساسي فنادي
الخليج .. ويعتمدون علي بشكل كبير فالملعب .. والحمدلله .. بفضل الله وبفضل جهود
اداره النادي . الفريق في الموسم هذا صعد للمتاز ..
الاب/ ممتاز ولاجيد جدا .. انا وش دخلني فديه كله
عبيدي/ صبرك يابو عيسى .. جايك بالكلام
الاب/ يالله كمل .. خلنا نشوف نهايتها وياك
عبيدي/ النادي بعد هالمجهود اللي توفقوا فيه .. محتاجين لوقفه اهالي البلد .. محتاجين للدعم
علشان يقدرون يكملون مشوارهم .. انت وغيرك من اللي الله رزقهم من خيره
المفروض يدعمون النادي ولو بمبالغ بسيطه علشان ............ ( يقاطعه الاب )
الاب/ وش فيكم انتون اليوم .. ذاك جايلي حق جمعيه وانت جايلي حق النادي .. وحمديوه
مأذيني عاوز مهيتي .. عاوز مهيتي .. وش هالحاله معاكم
عبيدي/ وش فيها اذا دعمت النادي دام انه بيرفع راسك وبيرفع اسم ديرتك فوق
الاب/ اهااااااااا .. يعني اذا تبرعت بيرتفع اسم ديرتي فوق .. موهالشكل ؟؟
عبيدي/ طبعا ..
الاب/ اجل دقيقه .. دقيقه هاه .. ( يدخل الاب ويحضر كوره )
الاب/ هاك اخذ .. يالله اخذها وروح العب بها فالنادي .. ولاتنسى تكتبون اسمي
من المتبرعين للنادي ..
عبيدي/ مشكور .. مشكور يابو عيسى .. كفين ووفيت .. فمان الله ..
( يخرج عبيدي ويدخل عيسى وهو فرحان جدا ) ..
عيسى/ يبه .. يبه .. اخيرا يايبه ..
الاب/ هاه وش صاير ..
عيسى/ شهايدي وصلوا من امريكا يايبه ..
الاب/ بشرك الله بالخير
عيسى/ اخيرا باستلم معاك الشغل
الاب/ والنعم بولدي .. باسلم منصب نائب رئيس مجلس اداره الشركه .. وش تبي بعد .
عيسى /(بتذمر) بس
الاب/ اجل وش تبي .. مدير
عيسى/ مثلا
الاب/ وانا وين رحت .
عيسى/ انت الخير والبركه .. بس جا الوقت اللي تستريح فيه وتعتد علي..
الاب/(يضحك) ياعيسى يامالك من الخير .. بكره بتمسك كل شي وبتصير الامر الناهي ..
عيسى/ اللي تشوفه يبه .. بس يايبه موكانه بما اني المهندس عيسى .. مولازمني مكتب
يليق بمقامي ..
الاب/ مكتب وسكرتير بعد ..
عيسى/(بتذمر) سكرتير .. يعني موسكرتيره ..
الاب/ عيسى لويكون تفكر نفسك بعدك قاعد فامريكا ..
عيسى/ .. يالله امرنا لله ..
الاب/ يالله الحين خلني اروح الشركه عندي اشغال الدنيا اهناك..
عيسى/ الله معاك يايبه .. ( ويخرج الاب)
عيسى/ اييييييييه .. والله وقرب اليوم .. قرب اليوم اللي بتمسك فيه افلوس ابوك ..
(يدخل حمدي حاملا شنطه السفر وهو يبكي بحركه فكاهيه)
حمدي/ مع السلامه ياعيسى
عيسى/ على وين
حمدي/ انا مسافر.. مش حاءعد هنا ولادئيئه ولاثانيه
عيسى/ ليش طيب
حمدي/(يصرخ فجأه ) شاللي ليش طيب .. تمان سنين وانا متحمل غلاسه جدك وابوك وفي
النهايه مايدينيش راتبي .. العيال وامهم حياكلو التراب ياعيسى ..
عيسى/ صل على النبي ياحمدي..
حمدي/ انا مصلي عالنبي قبل ماشوف وش ابوك
عيسى/ ياحمدي .. احنا من لنا غيرك
حمدي/ اه اها .. كل بعقلي حلاوه .. واديني شويتين من بتوعك
عيسى/ انالله .. طيب كلمه انت .
حمدي/ لألألأ .. انا عندي كرامه .. انا ماوطيش راسي .. انا ماترجاش حد ابدا .. اه امال ايه
عيسى/ زين اجل .. كل كرامتك تنفعك
حمدي/ والنبي تكلمه يابو العيس .. انت حتقدر تأثر فيه .. قلت ايه ..
( يرن جرس التلفون فيرفعه عيسى)
عيسى/ الو .. نعم هذا بيتهم .. من يتكلم .. هاه .. وش تقول .. ابوي صاده حادث




اظــــــــــــــــــــــلام


(ينزل مؤثر حزين مع بدايه الاظلام وتفتح الانوار مع نهايه المؤثر ويكون عيسى جالسا بالصاله وبيده حفنه من الاوراق ويبان عليه الارتباك في العمل .. يدخل في هذه الاثناء حمدي وهو يجر الاب على الكرسي المتحرك بعد ان شل اثر الحادث ثم يشير له عيسى بوضعه في نفس زاويه الجد)

حمدي/ عاوز حاجه قبل ماامشي ..
عيسى/ خلاص روح .. (يدخل لؤي)
لؤي/ بسك ياعيسى .. اربع وعشرين ساعه شغل ..
عيسى/(بتضايق) وش اسوي يالؤي ولا انا ملحق .. طالع الشغل زحمه على راسي ولا انا
عارف اشلون اتدبرامور الشركه ..
لؤي/ ايييييه .. الله يشافيك يايبه .. لوهو صاحي كان مشت الشركه زي الالف ..
عيسى/ by the way .. انا اقول وش رايك نوديه الجمعيه .. بدل ماحنا شايلين همه .. وحمدي
. بعد شايل همه .. انا ماصدقت اقنع حمدي يقعد .. الحين بيهون لما يشوف حمل ابوك
بيزيد عليه
لؤي/ جمعيه لالالا .. ياعيسى
عيسى/ ليش
لؤي/ لان احنا نقدر نرعاه
عيسى/ عرف بس ترى الجمعيه افضل له وبيكون مرتاح اهناك
لؤي/ ياعيسى .. صح الجمعيه مابتقصر.. وبياض على وجه اللي قايمين عليها ..
لكن احنا الزم بابونا
عيسى/ لكن يالؤي ..... ( يقاطعه لؤي)

لؤي/ افهمني ياعيسى .. مومعناتها ابوك طايح .. نقوم نتخلى عنه لا .. تذكر اشلون ابوك
امس .. كان يصول ويجول بهالبيت وكلمته تنهز الها جبال .. يوم اللقلت له تبي تروح
امريكا تدرس .. ماقصر معاك .. يوم اللي قلت له تي مكتب وسياره قال لك ابشر .. تقوم
بعد ديه كله تجازيه كدا .. بكره بتجيب اولاد ياعيسى وبيعاملونك مثل ماتعامل ابوك ..
ترى الدنيا دواره ياعيسى .. ايه الدنيا دواره ...
( هنا يحس عيسى بغلطته في اتخاذ هذا القرار )
عيسى/ وانت صادق يالؤي .. وانت صادق .. ابوي ماقصر وياي وانا في امس الحاجه ..
اقوم الحين اتخلى عنه واهوه في امس الحاجه لي ..
لؤي/ احنا لازم نرعاه ياعيسى .. لازم .. مانبي نزعل جدي .. ولانكدر تربته

(ينزل البلاي باك ويذهب الاثنان الى ابيهم ويقبلونه )

بلاي باك نهاية المسرحيه : ـــ
يامال .. يامال .. يامال
يابوي حزني كبر ..
وانت الـ طفى حزني
ساكن يابوي القبر ..
والحمل خف عني
جدكم اولادي كبر ..
وبالنصح علمني ....


نهــــــــــــــــــــــــاية المسرحيــــــــــــــــــــه