مسرحيه أحلامنا

تأليف شريف صلاح الدين‏

اولا وبنات(ورشه عمل للأطفال)

الديكور استوديو للبث التلفزيونى به عديد من الالات الموسيقيه كالدرامز و الاكورديون و العود ومايمكن استغلاله من مواهب المشاركين فى العرض __
المذيعة1:أهلا ومرحبا بكم في البث التجريبي الخاص بقناة الأطفال التليفزيونية أحلامنا
المذيعة2 :إحنا قناة خاصة جدا بنتكلم من خلالها عن أفكارنا وطموحنا والأهم من دا كله إحنا شايفين العالم ازاى
المذيعة3 :هانقدم فقرات خاصة بينا من إنتاجنا إحنا يعنى بإمكانياتنا
المذيعة2 :وبالتأكيد إحنا استفدنا من المساعدات الموجودة هنا و برضه استفدنا من خبرات الأكبر مننا
المذيعة1 :وفى الحقيقة هما شجعونا جدا
المذيعة2 :و النهاردة في البث التجريبي بقناة الأطفال التليفزيونية أحلامنا اعذرونا لو حصل أي سهو مننا أو حصل اى خطا مننا وكفاية ان إحنا بنحاول مع أحلامنا
_يدخل مجموعة من الموهوبين لتقديم فقرات سريعة مختلفة ما بين الغناء والتقليد_

المذيعة3 :الغنوة
المذيعة2 :المشهد التمثيلي
المذيعة1 :العرائس
المذيعة2 :لقاءات متنوعة
المذيعة1 :الإعلانات التربوية
المذيعة2 :ونحن نستقبل أرائكم على
المذيعة3 :0900 والباقي من خيالك

_رنين تليفون_

فرد1 :الو
مذيعة1 :ايوة ..ايوة
فرد2 :دادى فين
مذيعة1 :دادى مين؟
فرد1 :دادى السيد احمد عبد الجواد هيثم
مذيعة1 :لا يا أفندم ..النمرة غلط ..هنا قناة الأطفال التليفزيونية أحلامنا
_ مؤثر موسيقى من خلال لعب الاولاد بالالات الموسيقيه _

_يدخل عم حمزة_

عم حمزة :معايا الأحلام الطازة ..الأحلام السخنة ..أحلام لكل الأعمار ..بس انت غمض عينيك واختار
فرد1 :( غناء )عم يا عم
عم حمزة :ايوة يا بنتي
فرد1 :انا عايزة حلم وأحققه
عم حمزة :مدى ايديكي في الجراب و اختاري
فرد1 :بس انا خايفة ( ينتهى الغناء)
عم حمزة :من ايه؟
فرد1 :يمكن لانى مش فاهمة يعنى ايه أحلام
عم حمزة :الأحلام يعنى أمنيات للأفضل وطموح بتختاريه و بتجتهدى علشان تحققيه ..ولما تحققيه تحسي بالسعادة
فرد2 :ممكن احلم اكتر من حلم؟
عم حمزة :طبعا :وكل حلم تحققه يبقي خطوة فى حلم اكبر منه
فرد2 :بس انا مش عارف بحلم بايه؟
عم حمزة :غمض عينيك ..وحس بالدنيا ..شوف انت عاوز تبقي ايه ..وتخلى الدنيا ايه؟
فرد2 :يلا نغمض عينينا ونحلم
عم حمزة :شايفين ايه؟
فرد1 :شايفين أفكار بكرة
فرد2 :شايفين عالم واحد
فرد3 :شايفين ايد واحدة
فرد4 :شايفين النور بيعدي الضلمة
فرد5 :شايفين الناس بتشق طريقها للأحلام والخير
فرد6 :الورد بينشر ريحته
فرد7 :القلب المطمئن زى القمر الصافي
فرد8 :الحب مراكبي بيعدي الناس ف المية
_تشكيل حركى لبحاره على سفينه يجدفون بها ..على غناء مصاحب كخلفيه بأغنية صلي ع النبي ..هيلا هيلا ..يبدأ أفراد العرض في ترديد أحلامهم الخاصة ..كل على حدا .. ويقول الممثلون احلامهم الحقيقيه وان بدت بسيطه ..تنتهي بأحدهم يتمنى أن يصبح وزيرا ليرفد ناظر المدرسة_

عم حمزة :حاسب ..أحلام الشر ..مش أحلام الخير وبس ..زى حكاية باسل ..كان يا ما كان في ولد اسمه باسل ..بيحب بلده ..لكن بلده كانت عايشة في الخوف الشديد بسبب وحش كبير كان بيهاجم المدينة وما فيش حد كان قادر يحلم
المذيعات :استنى ..استنى
مذيعة3 :ما تحكيش الحدوتة
مذيعة1 :إحنا هانمثلهالكم
مذيعة2 :يلا استعدوا
مذيعة1 :والآن مع اولى حلقات المسلسل باسل والوحش


_الحلقة الأولى_
_ (المكان :قصر السلطان) السلطان في حالة من القلق ..يذهب يمينا ويسارا
الملك :ايها الحاجب
الحاجب :أمر مولاي
الملك :فين الوزير؟
الحاجب :بيلف ف المملكة يا مولاي ..و بيسمع لشكاوى الناس
الملك :ابعتله حالا ..عايزه ييجي بأسرع وقت ممكن
الحاجب :أمرك يا مولاي
الملك :شئ عجيب وغريب ..وحش كبير ..أنا يحصل كدا فى عهدي؟ ..معقول ..انا مش قادر اعمل اى حاجة ..ازاى؟ ..لازم طريقة تخلص المملكة من الوحش دا ..لازم المملكة يرجع لها الأمن والأمان ..بس ازاى؟ ..ازاى
الحاجب :مولاي الوزير
الملك :خليه يدخل حالا
الوزير :السلام والأمان على مولاي ..ملك الزمان
الملك :اسمع يا وزير ..انت عارف كويس ان العدل والأمن والأمان ..هما عماد ملكي ..عرف ولا لأ؟
الوزير :طبعا يا مولاي
الملك :جميل ..(بتهديد) قولي بقي ..عملت ايه فى موضوع الوحش اللي ظهر ف المملكة؟
الوزير :مولاي الملك ..انت عارف انها حادثة أول مرة تحصل ..و إحنا لسة بندور ازاى نقدر نواجهها
الملك :لسة بتدوروا؟ ..امال فين قوات الشرطة الى مفروض انها بتواجه الأمور الخاصة بالأمن ف المملكة؟
الوزير :الشرطة يا مولاي ..مش متدربة علشان تقبض على الوحوش ..وكمان هى مش عارفاله طريق ..علشان الوحش دا ..بيظهر وبعدين بيختفى ويظهر وبعدين بيختفى ..وبالتأكيد يا مولاي ..ماحدش قادر يراقبه ..ليه بقي؟ ..علشان أول ما بيظهر ..كل اللي قدامه بيجري ..ويهرب ايوة يا مولاي ..ما هو العمر مش بعزقة ..عشان كده ماحدش عارف له سكة
الملك :خلاص ..راقبه انت
الوزير :انا ..انا يا مولاي ..انا تحت أمرك ..بس ..بس
الملك :بس ايه يا وزير؟ ..انت خايف ولا ايه؟
الوزير :كلا ..كلا وألف كلا ..انت ما تعرفنيش ولا ايه؟ انه انا ..انا وزير البلاد على سن ورمح ..بس ..بس أمور الحكم يا مولاي ..مخليانى مشغول ليل ونهار ..بص ..انا عندي فكرة ..نستعين بحكيم المملكة
الملك :ونعم الرأي يا وزير ..ايها الحاجب ..ابعتلى حكيم المملكة
الحاجب :أمر مولاي
الملك :ولما ييجي الحكيم ..اسأله أسئلة كتيرة ..ازاى ممكن ان وحش يظهر و يختفي ..و جاى منين ..و ازاى نواجهه ..لازم اعرف كل حاجة ..لازم
الوزير :اطمئن يا مولاي ..محلولة بإذن الله
الحاجب :حكيم المملكة
الملك :خليه يدخل
الحكيم :السلام و الامان على ملك الزمان
الملك :وعليك السلام ..انا بعتلك لانى محتاج لمشورة
الحكيم :كلى آذان صاغية
الوزير :مولاي الملك عايز يعرف كل حاجة عن الوحش ..جاى منين و ازاى نقدر نواجهه
الحكيم :وطيف لي ان اعرف شئ عنه .. و انا لم أره؟
الملك :بتقول ايه؟ ..انت كمان ما تعرفش حاجة
الحكيم :انا لم اقل هذا يا مولاي
الوزير :انت قلت انك ما تعرفش حاجة عنه
الحكيم :لم أره ..فانا كما تعلم يا مولاي ..دائما في خلوتي ..ولهذا فلم تكن هناك اى فرصة كي أرى هذا الوحش .. وعلى هذا فانا لا استطيع ان أدلك
الملك :شايف يا وزير .مش انت قلتلى ان الحكيم عارف كل حاجة .. فرمان سلطاني ..تروح حالا و تجيبلي رأس الوحش دا ..وإلا
الوزير :يا مولاي ..يا مو ..لاى .. (للحكيم) خرجني م الورطة دى أرجوك
الحكيم :عندي اقتراح يا مولاي
الملك :قوله حالا..
الحكيم :فلتأمر بإرسال المنادى ..كي يعلن لأهل المملكة أن من يقتل الوحش ..له مكافأة عظيمة ولتحددها بنفسك يا ملك الزمان
الملك :اقتراح عظيم ..وها نأمر ان اللي يجيب رأس الوحش له مكافأة كبيرة ..صندوق من الذهب لا ..صندوقين ..و هاجوزه بنتي الأميرة ..و ازازة حاجة ساقعة ..و هايكون الملك بعد منى
الوزير :ونعم الرأي يا مولاي ..أي والله ..ونعم الرأي
مذيعة :الى هنا تنتهي حلقة اليوم من مغامرات باسل والآن مع هذا الفاصل
(أغنية تاتا خطى العتبة تاتا واحدة واحدة
إحنا الشطار بكرة راح نبقي كبار
نشتال بايدينا الحلم ونخلى الدنيا عمار)
ويصاحبه دخول اطفال حقيقيون يحبون وتدريجيا يقفون بنهايه الغناء
مذيعة :والآن مع الحلقة الثانية من مغامرات باسل


_الحلقة الثانية_

_السوق ..أصوات البائعين تعلو_
عم حمزة :معايا الأحلام ..الأحلام الطازة
بائع1 :خلاص يا عم حمزة ..ماعدش أحلام بتتباع ..ولا اى حاجة ..الحال بقي واقف
بائع2 :الناس خايفة ..تنزل من بيوتها ..خايفين من الوحش
عم حمزة :و اشمعنى انتو نزلتوا
بائع1 :اهه ..أكل عيش بقي
بائع2 :لسة فيه عندنا شوية أمل ..نبيع حاجة الناش خايفة اوى يا عم حمزة
بائع1 :الناس عندها حق
عم حمزة :يعنى ايه؟ ..خلاص ماعدش حد هايحلم
بائع1 :وإيه فايدة الحلم .. مادام الواحد مش ضامن يرجع بيته تانى
بائع2 :فيه حد جاى من بعيد اهه ..يمكن زبون
_تتعالى الأصوات ..يدخل باسل_
بائع :دا باسل
_يعودوا لوضع أيديهم على خدودهم_
باسل :ازيك يا عم حمزة ..عامل ايه؟
عم حمزة :زى كل الناس ..مفيش حد يبيع ولا يشترى
باسل :حتى الأحلام يا عم حمزة؟
عم حمزة :حتى الأحلام
باسل :بس الأحلام هي بكرة الجميل ..والجديد ..وكل الحاجات اللي موجودة دلوقتى .. وما كنتش موجودة قبل كدا .. كانت زمان مجرد أحلام لناس ..فكروا فيها ..يعنى الاختراعات اللي بنسمع عنها كل يوم ..دى كانت أحلام زمان
عم حمزة :أقولك على سر كبير
باسل :قول يا عم حمزة
عم حمزة :انت عارف انا عمري كام سنة
باسل :ماعرفش ..بس ان من يوم ما وعيت ع الدنيا ..و انا شايفك كدا وأبويا برضه شافك كدا ..و جدي وجد جدي
عم حمزة :وطول ما الناس بتحلم انا موجود ..ولعلمك لولا حب الحلم اللي جواك يا باسل ..كنت هاموت
باسل :مش فاهم
عم حمزة :طول ما الناس بتحلم انا عايش ..لو الناس بطلت أحلام يا باسل عشان كدا انا حاسس بالضعف ..الناس خايفة م الوحش ..ممكن تساعدني؟
باسل :ازاى
عم حمزة :لازم تقضي على خوف الناس ..لازم الناس تطمن ..اقض على الوحش
باسل :اقضي عليه؟ ازاى؟
عم حمزة :خليه حلمك الطيب
المنادى :يا أهالي المملكة ..إعلان هام ..يعلن ملك الزمان مولانا السلطان ..أن من يقتل الوحش و يأتى إليه برأسه ..له صندوقين من الذهب وسيتزوج بأميرة البلاد ..ابنة مولانا السلطان ..وله ازازة حاجة ساقعة ..يا أهالي المملكة (يخرج)
بائع1 :الأميرة صندوقين دهب ..ايه الكرم دا
بائع2 :بس الوحش دا مرعب ومحتاج لأف راجل
باسل :خلاص يا عم حمزة أنا لازم أفكر ازاى اعمل كدا
بقلول :انتم ما شفتوش الأميرة ..دى جميلة جمال وعينيها تسحر القلب ..انا هاقضي ع الوحش و أتجوز الأميرة ..سواء برضاها ..أو غصب عنها
_يدخل الوحش ليهاجم المملكة ..الجميع يهرب ..صمت ..تدخل المذيعة خائفة_
مذيعة :والآن انتهت الحلقة التانية من مغامرات باسل ..والآن مع النشيد الوطني للفواكه
_ فاصل اعلانى لمجموعة من الفواكه_
مذيعة :الآن مع الحلقة الثالثة من مغامرات باسل



_الحلقة الثالثة_
_المسرح مقسم الى بيت الحكيم بتكوين بشري ..يدخل باسل_
الحكيم :من الهاتف الداعي
باسل :انا يا حكيم المملكة ..أنا باسل
الحكيم :وماذا تريد يا باسل؟
باسل :عايز اخد رأيك ف حاجة انا شفتها
الحكيم :وما هى؟
باسل :امبارح ..الوحش هاجم المملكة ..أنا كنت موجود ..كل الناس جرت من قدامه ..زى العادة أنا استخبيت ..وبعد ما دمره ..وراجع ..قمت ومشيت وراه ..بقي يعدى الجبل ..والبحيرة والغابة ..وف الغابة اختار شجرة غريبة ونام تحتها ..ساعتها أنا قربت منه ..بس لفت نظري حاجة غريبة ..كان ملزوق على قفاه نجمة شكلها غريب
الحكيم :هل انت متأكد مما تقول؟
باسل :طبعا
الحكيم :يا للهول ..انها شئ فظيع شنيع مريع
باسل :ايه ؟
الحكيم :فظيع ..شنيع ..مريع
باسل :ليه ؟
الحكيم :ان هذا الوحش مدمر ..وصعب في القضاء عليه
باسل :ما انا عارف ..وعشان كدا انا جاى اخد رأيك
الحكيم :اسمع يا باسل ..ان هذا الوحش من مملكة مجاورة ..تسمى ديمونة ..انه وحش نووي ..و للقضاء عليه لابد من ثلاثة أشياء ..لابد أن تنفذها بدقة
باسل :و ايه هى التلات حاجات دى ؟
الحكيم :أولا ..أن تضربه في ساقه ..وثانيا على قفاه ..وثالثا ..في صدره
باسل :في ساقه ..وبعدين على قفاه ..وبعدين صدره
الحكيم :نعم ..وان لم تفعل هذا ..فسوف ينفجر فيك ويدمر نصف المملكة في انفجاره
باسل :نص المملكة؟
الحكيم :نعم ..نصف المملكة
باسل :يا خبر ..أعمل ايه؟ ..انا وعدت عم حمزة ..انى اقضي على الوحش ..الناس خايفة وما عدتش بتحلم
الحكيم :و انت يا باسل ؟
باسل :انا كمان خايف
الحكيم :كن قويا يا باسل ..الخوف يقتل الأحلام ..فكر بطريقة علمية لتصل الى ما تريده ..امتلك الإرادة يا باسل ..فالإرادة تستطيع بها ان تحقق أحلامك ..الإرادة تقهر الخوف وتحقق المستحيل
باسل :كلامك شجعني ..انا هافكر ازاى اقضي على الوحش دا
الحكيم :ولا تنسي يا باسل ..الساق أولا ثم القفا ثم الصدر
باسل :مش ناسي ..الساق وقفاه وصدره ..توكلت على الله
_مشهد قتل الوحش ثم دخول بقلول وسرقة الرأس_
بقلول :ضحكت عليك يا باسل ..وأخذت الرأس منك ..دلوقتى أروح قصر السلطان ..واخد المكافأة ..وأتجوز الأميرة (يضحك)

مذيعة :والى هنا تنتهي حلقة اليوم من مغامرات باسل ..والآن مع فرق كورال الأطفال الذي لم يحصل على أي جائزة ولم يشترك في اى مهرجان وان شاء الله

_اغانى أطفال فلكلورية_

مذيعة :والآن مع الحلقة الأخيرة من مغامرات باسل



_الحلقة الأخيرة_

المنادي :يا أهالي المملكة ..إعلان هام يعلن ملك الزمان ..مولانا السلطان ..أن بقلول السحلول ..قد قتل الوحش وأن المملكة أصبحت في أمان ..وانه استحق الجائزة وهى صندوقين من الذهب ..وزواج الأميرة ..و ازازة حاجة ساقعة ..يا أهالي المملكة
1 :عشنا وشفنا ..معقول ..بقلول السحلول يموت الوحش
2 :اهه ..من حظه ..المهم إننا بقينا في أمان
باسل :ايه ..كداب ..بقلول كداب ..انا اللي موت الوحش..انا اللي خلصت المملكة من شره
3 :يا راجل ..إحنا مش مصدقين زيك ..بس مش لدرجة إننا نقول كدا
4 :والله فكرة ..كداب ..انا اللي موته
باسل :يا جماعة صدقوني ..صدقني يا عم حمزة ..انا اللي عملت كدا
حمزة :ازاى يا باسل ؟
باسل :لما لقيتك بتضعف علشان ماحدش بيحلم ..خفت عليك يا عم حمزة ..خفت الناس ما تحلمش ..علشان كدا اخدت منك إنقاذك علشان تفضل لينا دايما ..تدينا الأحلام
عم حمزة :والناس رجعت تحلم تانى يا باسل ..شايف فرحتهم بالأمن ..شايف لما الخوف انشال من قلوبهم ..السعادة مالية وشوشهم ازاى؟ ..الأحلام رجعت المملكة يا باسل
باسل :بس انا اللي حزين يا عم حمزة ..حاسس بالظلم ..لأن دا حقي مش حق بقلول
عم حمزة :زى ما قدرت ع الخوف يا باسل ..هاتقدر ع الظلم ..هاتقدر تحقق اى حاجة محتاجها
باسل :خلاص يا عم حمزة ..هاروح قصر السلطان ..وربنا ينصرني ان شاء الله

_قصر السلطان_
بقلول :وفضلت أجيبه كدا ..ويجيلي كدا ..لغاية ما اتملكت منه ..وقضيت عليه
الملك :برافو عليك يا بقلول ..انت فعلا راجل شجاع
بقلول :شكرا لك يا مولاي
الوزير :معقول ..واحد زى بقلول دا ..يعمل كدا ..ازاى دى حتى ماتنفعش ..غريبة ..أنا حاسس ..ان فى الموضوع ان ..(لبقلول) عظيم عظيم يا بقلول حقيقي ..انا مش مصدق ..ان فيه بطولة كدا أبدا
الحاجب :مولايا ..فيه واحد من الشعب طالب مقابلتك حالا ..وف الحال
الملك :عاوز ايه ؟
الحاجب :مش عارف يا مولاي ..بس هو بيقول انها حاجة تخص بقلول والوحش ..وانه شئ مستعجل
الوزير :بقلول والوحش ..(ان ان آآآ) اسمه ايه الجدع دا ؟
الحاجب :باسل يا مولاي
بقلول :باسل
الوزير :باسل ..مال وشك اصفر كدا ليه ..يا ..بقلول ..بعد إذن مولاي يدخل ..اهه ..نعرف برضه
الملك :خليه يدخل
بقلول :يا مولاي ..باسل دا انا عارفه ..دا كداب ومجنون ..وبيقول حاجات كتير ما بتحصلش
الوزير :ايه؟
الحاجب :باسل يا مولاي
باسل :السلام والأمان على مولاي السلطان
الملك :وعليك السلام ..عاوز ايه يا باسل؟
باسل :يا مولاي ..بقلول كداب وأنا اللي قتلت الوحش وعدين الرأس اتسرقت منى
الوزير :ايه؟
بقلول :مش قولتلك يا مولاي؟ ..اهه ..كداب ومجنون
الملك :انت بتقول ايه يا باسل ..ازاى تتجرأ وتكدب وأنت قدامى
باسل :دى الحقيقة يا مولاي ..صدقني
الوزير :مولاي ..انت ملك عادل ..ملك عادل ..هدى نفسك بس ..لازم الأول نحاول نتأكد مين فيهم الكداب ومين الصادق
الملك :رأيك ايه يا وزير ؟ ..نستعين بحكيم المملكة
الوزير :نعم الرأي يا مولاي
الملك :ايها الحاجب ..هات حكيم المملكة حالا
الحاجب :أمر مولاي
الوزير :ودلوقتى هانتأكد لما ييجي الحكيم ..ويا ويل الكداب اللي فيكوا
الحاجب :حكيم المملكة
الملك :خليه يدخل
الحكيم :سلامو عليكو
الملك :وعليك السلام
الوزير :الملك عاوز يعرف مين اللي كداب فيهم ..باسل ولا بقلول ..مين اللي أنقذ المملكة؟
الحكيم :قول يا بقلول ..قل لى ..كيف قتلت الوحش؟
بقلول :بس كدا ..الوحش كان كبير قوى ..وشكله يخوف ..استخبيت ورا صخرة وبعدين هو شم ريحتى ..جه عليا ..رحت مقابله ..وأجيله كدا ويجيلي كدا ..لغاية لما طوقته من رقبته ..وقع أغمى عليه ..رحت خابطه على دماغه ..وقع ميت
الحكيم :وأنت يا باسل؟
باسل :انا سمعت كلامك ..وخبطه فرجله وبعدين قفاه وبعدين صدره
الحكيم :لقد حلت المشكلة ..أيها الملك ..ابعث برجالك الى مكان الوحش فان رأيت أثرا على ساقه ثم قفاه ثم صدره ..فقد صدق باسل وكذب بقلول وان لم يكن ..فقد صدق بقلول
الملك :نعم الرأي
الحكيم :وان كنت على يقين من كلام باسل ..فالوحش لا يموت إلا هكذا (صمت انتظارا لعودة الحراس)
الملك :الحقيقة ظهرت ..وبقلول كداب
الوزير :كنت حاسسها ..صدق باسل ..وكذب بقلول ..فكرة هائلة يا حكيم
الملك :فرمان سلطاني ..قررنا نحن ان نكافأ باسل على شجاعته وصدقه ..بأن نضاعف قيمة الجائزة الى أربع صناديق من الذهب ..وزواج الأميرة وبنت عمها ..وصندوق حاجة ساقعة ..وأن نعاقب بقلول السحلول الكداب بـــــــ
بقلول :مولاي
مذيعة1 :وتوتة توتة
مذيعة2 :فرغت الحدوتة ..قصدي المسلسل
مذيعة3 :عملناه بإمكانياتنا
مذيعة 1 :علشان نقول ان الأحلام ما بتقفش على إمكانياتنا كبيرة أو بسيطة
مذيعة2 :المهم إننا نحاول نحققها
مذيعة3 :وقبل ما ننهى إرسالنا النهاردة
مذيعة1 :يهمنا نسأل
مذيعة2 :ايه اللي أجمل من الأحلام ؟
الجميع :تحقيق الأحلام
مذيعة3 :وعشان تحققوا الأحلام ابدءوا زينا بإمكانيات بسيطة ..وجهد كبير ..إحنا تعبنا قوى
مذيعة1 :على فكرة المسرح علمنا ازاى نحب بجد أفكارنا ونتعب عشانها وادى النتيجة
الجميع :أحلامنا
مذيعة :ودلوقتى لازم تحلموا معانا ..وعشان تحلموا
الجميع : (غناء) عيش حياتك بس ابحث عن ذاتك